بحب البراءه

بحب البراءه في وش العيال

وخان الخليلي ولاقصر وريش

وحس الأغاني في بيت السحيمي

وصوت الرفاقه في قهوة حشيش

مدرج تجاره ومستر عصام ..

بتاع الرياضه في تالته إبتدائي

وأحب العروبه وصاحبي العراقي

وريف البداري وأرضه الشراقي

بخاف إني أعبر ويطلع شعوري

وأخاف إني أقولك بحبك تثوري

تقوم الديابه تقصقص في ريشي

بحبك وراضي إني أموت ألف مره

بشرط إن حضرة جنابك تعيشي

بحب الحكومه وأحب الرئيس

وأحب البياده في رجل الشاويش

وطول عمري راكع وحلمي أعيش

وإنتي إللي ليا وغيرك مليش

لبست في قضيه عشان قولت هي

نزلت في مظاهره لبست في حديد

وقولت إني أطالب بأبسط حقوقي

لاقتني بتعامل معاملة عبيد

نزلت في يناير لبست في دقون

شاركت في تمرد فا جاني البعيد

وقال فوضوني وبكره تشوفوا

عجبني كلامه لبست في شهيد

أبويا اللي عامل حلانجي وحكيم

ودايما يقولي كلامك عبيط

وعيل صغير متفهمش حاجه .. وعامل حويط

شايفني ليلاتي بعاني في طريقي

وبحضر يوماتي جنازه لصديق

وأخش المحاكم وأشوف المهالك

بتهمة مناضل بدرجة برئ

وساكت وراضي وقاعد يدادي

لحد إما تدخل بلدنا الغريق

بقلم : عمرواللمعي

مشكور على الموضوع الرائع

رائع احسنت النشر

شكرا على الموضوع

رد: بحب البراءه