انا مليت 3

الو هو انت ليه ساذج !

الو هو انت لسة غشيم !

وفاكر اني هرجعلك

وهبكي واقول حبيبي نعود !

ملكش في قلبي اي وجود

دانا بعدك بقيت بحلو

وواكلة الجو

ونادرة وقادرة ماشاء الله

كأنك كنت سحر اسود

ودافن ضحكتي وياه

اقولك سر!

مكنتش وجهه ولا نيلة

قليل حيلة ولا تنفع تكون ضهري

وبحمد ربنا بعدك علي بُعدك

عشان كان خير

دانا والله ف وجودك مقولتش مرة اني بخير

تشوفني بغير ! تزيد ثقتك وتتكبر وتأذيني

وبعد ما فوقت ، جي تقول وحشتيني !

فاكرني ضعيفة وهجيلك !

ببيعك زي ما اتخليت !

وندمانة اني قولت ف قربك " انا مليت "

ومبسوطة ان انا سايباك

مشفتش لحظة حلوة معاك

عشان كل اللي عيشته .. أذي

نكد بتحول الأفراح عزا

ف قربك كنت مطفية

وحاسه مليش اهمية

وكل الناس تقول " هي "

واقول انا حاسه اني يئست

معاك عجزت !

كبرت الضعف علي سني

وكنت احكيلك اني تعبت

تقولي اكيد دة مش مني !

وبحمد ربنا اني

رميتك برا تفكيري

كأني طفلة بتحب السلام

وسابت قلبها علي كف تكفيري

واديني رجعت ، بتنفس امل وحياة

وشايلة الحلم علي كتفي

ويوم الحلم بينور ويوم يطفي

لكن حاطه الأمل في الله

وراضية وهادية ومسالمة

ومش بستني لا رسالة ولا مكالمة

اخيراً عقلي بقا مرتاح

وقافلة القلب بالضبة وبالمفتاح

ومش هسمح لضهري يميل

وراضية وحالي عال العال

ولو ع الحب !

ف بكرة يجيلنا بدل ال

الف غزال ..

بقلم : الأخت و الصديقة أميرة البيلي